د پوهنې وزارت لخوا د هېواد له ۲۵ وزارتونو او ادارو سره د سواد زده کړې کچې لوړولو په موخه، د ګډو همکاریو هوکړه لیکونه لاسلیک شول
د پوهنې وزارت له لوري، د هېواد له ۲۵ وزارتونو او ادارو سره، په ادارو کې د نالوستو کسانو لپاره د سواد زده کړې کچې لوړولو په موخه، د ګډو همکاریو هوکړه لیکونه، د پوهنې وزارت د ښوونې او روزنې معین الحاج مولوي سخاءالله سعید، د کیفیت تضمین معین الحاج مولوي عبدالخالق صادق، مرکزي رئیسانو، د یو شمېر نورو وزارتونو معینانو او مسئولینو په حضور کې لاسلیک شول، چې په دې سره به یادې ادارې د علمي همکاریو نوی باب پرانیزي.
په پیل کې د پوهنې وزارت د ښوونې او روزنې معین، ټولو ګډون والو او مېلمنو ته د ښه راغلاست ترڅنګ، د یادې غونډې په تړاو مفصله وینا وکړه او ویې ویل: پوهنې وزارت په خپل بې سارې اقدام کې د مرکزونو په شمول هغو لیرې پرتو سیمو ته هم ښوونیز او روزنیز چوپړونه رسولي، کوم چې د تېرې ادارې پرمهال ورته هېڅ ډول پام نه و شوی.
نوموړي زیاته کړه، په بېلابېلو برخو کې د پوهنې وزارت له پرمختګونو سربېره، نن ورځ د ۲۵ ادارو سره د سواد زده کړې کچې لوړولو لپاره هوکړه لیکونه لاسلیکوو، چې په حقیقت کې دا په ادارو کې د نالوستو کسانو لپاره یو طلایي فرصت دی، تر څو هر هېوادوال د علم او پوهې له رڼایۍ څخه برخمن شي.
ورپسې د پوهنې وزارت د کیفیت تضمین معین، د یاد وزارت لخوا د هېواد له ۲۵ وزارتونو او ادارو سره د سواد زده کړې کچې لوړولو په موخه د یادو هوکړه لیکونو لاسلیکېدل خورا مهم وبلل او څرګنده یې کړه چې د اسلام په مبارک دین کې پر کتابت زیات ټینګارشوی؛ دا ځکه چې د ورځني ژوند د ټولو کړنو پرمختګونه د لیک لوست پر پیاوړتیا او تر لاسه کولو پورې تړلې دي.
په ورته مهال د یو شمېر نورو وزارتونو مسئولینو او علماءکرامو هم د لیک لوست د اغېزو او اهمیت په تړاو هراړخیزې علمي ویناوې وکړې او د ټولنې افراد یې د علم او پوهې تر لاسه کولو ته وهڅول.
په پای کې د پوهنې وزارت په استازیتوب د یاد وزارت د ښوونې او روزنې معین او کفیل الحاج مولوي سخاءالله سعید او د هېواد د ۲۵ نورو وزارتونو او ادارو باصلاحیته استازو ترمنځ د سواد زده کړې کچې لوړولو په موخه د ګډو همکاریو هوکړه لیکونه لاسلیک شول.
د یادونې وړ ده، چې د پوهنې وزارت د لایحو په رڼا کې د همکاریو دا ډول تړونونه به د اړوندو وزارتونو او ادارو د نالوستو کسانو لپاره د سواد کچې لوړولو او تجربو شریکولو په برخه کې یو غوره فُرصت رامنځته کړي.
دغه پرتمینه غونډه په دعائیې سره پای ته ورسېده.
