په تېر ۱۴۰۳ ښوونیز کال کې د پوهنې اړوند ۹۵۴ بابه تدریسي او اداري ودانۍ ترمیم شوې دي
د پوهنې وزارت د ملکیتونو د ساتنې او مراقبت د رئیس مولوي سمیع الحق حماس په وینا، د تېر۱۴۰۳ لمریز کال پرمهال، په ټول هېواد کې د ۴۵۵ مېلیونه افغانیو په لګښت د پوهنې ۹۵۴ بابه اداري او ښوونیز مرکزونه بیارغول شوي او ګټې اخیستنې ته سپارل شوي دي.
د نوموړي په وينا، په مرکز او ولایتونو کې د ۹۵۴ بابه ترمیم شویو ودانیو له جملې څخه یې ۸۷۱ بابه تدريسي او اداري ودانۍ د وزارت له عادي بودیجې څخه او پاتې ۸۳ بابه د همکارو ادارو په ملاتړ ترميم شوي دي.
لکه څرنګه چې پوهنې وزارت د ټولو افغانانو ګډ کور دی؛ نو د هېواد د تعلیمي سیسټم د ملاتړ لپاره زموږ د علم پروره هېوادوالو دوامداره مرسته او ملاتړ به دپوهنیز نظام په لازیاته پياوړتیا کې مهم اغېز ولري، ترڅو د هیواد بچیانو ته لازیات ښوونیز او روزنیز چوپړونه وړاندې شي.
له همدې امله، یو ځل بیا دعلم دوسته هېوادوالو، په ځانګړې توګه د شتمنو شخصیتونو او ملي سوداګرو څخه د دوامداره او پراخه مادي او معنوي ملاتړ غوښتنه کوو.
