د پوهنې وزارت سرپرست په رسمي سفر بدخشان ولایت ته ولاړ
د پوهنې وزارت سرپرست الحاج مولوي حبیب الله آغا او ورسره مل پلاوی، د بدخشان ولایت د پوهنیز وضعیت ارزونې او ښوونیز بهیر بیاکتنې په موخه، مرکز فیض آباد ته ورسېد.
په پیل کې د پوهنې وزارت سرپرست د بدخشان ولایت د پوهنې نوي رئیس د پېژندګلوۍ په مناسبت جوړه شوې غونډه کې ګډون وکړ او د ټولنې په اصلاح او پرمختګ کې یې د علم او پوهې پر ارزښت د خبرو سربېره، د یاد وزارت د پراختیایي پروګرامونو په اړه ارزښتناک معلومات وړاندې کړل.
همدارنګه نوموړي په ادارو کې د علمي کادرونو تقرر او تبدیلي یو اداري اصل وګاڼه او د یاد ولایت د پوهنې د پخواني رئیس الحاج مولوي نصرت الله فیضاني د ترسره کړو خدمتونو یادونه یې وکړه، مولوي محمد طاهر جواد یې د یاد ولایت د پوهنې د نوي رئیس په توګه معرفي او د ورسپارل شویو دندو په ترسره کولو کې یې نوموړي ته د خیر دعاء وکړه.
په دغو مراسمو کې د پوهنې وزارت د چارواکو او منسوبینو سربېره، د سیمه ییزو حکومتي ادارو یو شمېر مسئولینو، علماء کرامو او د خلکو استازو هم برخه درلوده.
په ورته مهال د پوهنې نوي رئیس په خپله وینا کې د اسلامي ا/مارت د مشرتابه عالي مقام او د پوهنې وزارت د رهبرۍ له باور څخه د قدردانۍ ترڅنګ ژمنه وکړه، چې په خپل ټول توان او تجربې سره به هڅه وکړي، چې د یاد وزارت د مشرتابه د لارښوونو په رڼا کې ورسپارل شوې دنده په غوره او وجه احسن ډول ترسره کړي.
له بلې خوا د بدخشان ولایت یو شمېر چارواکو او علماء کرامو په خپلو ویناوو کې د پوهنې وزارت سرپرست او د هغه مل پلاوي ته ښه راغلاست ووایه او د یاد وزارت د مشرتابه له هڅو، چې په دغه ولایت کې یې د پوهنیز کیفیت لوړولو او د هېواد پوهنیز سیسټم لپاره یې ترسره کوي، ستاینه وکړه او په یاده برخه کې یې د دوی پر مادي او معنوي ملاتړ ټینګار وکړ.
