د پوهنې وزارت د نتایجو او شهادتنامو ریاست د ډومین سیسټم طرحې په اړه غونډه ترسره شوه
د پوهنې وزارت د کیفیت تضمین معین محترم الحاج مولوي عبدالخالق صادق په مشرۍ، د نتایجو او شهادتنامو ریاست د ډومین سیسټم طرحې په اړه د اړوندو وزارتونو او ادارو د استازو په ګډون غونډه ترسره شوه.
په پیل کې د پوهنې وزارت د کیفیت تضمین محترم معین ګډونوالو ته د ښه راغلاست ترڅنګ، د یادې طرحې پر اهمیت خبرې وکړې او ټینګار یې وکړ چې د اداري چارو په ترسره کولو کې دې صداقت، ژمنتیا، اسانتیا او اخلاص ته ځانګړې پاملرنه وشي.
ورپسې د نتایجو او شهادتنامو رئیس محترم مولوي عبدالقدیم محمد آخندزاده د ډومین سیسټم طرحه تشریح کړه او د یاد ریاست د کاري موخو، اوسني وضعیت، پرمختګونو او ستونزو په اړه یې معلومات وړاندې کړل.
نوموړي زیاته کړه، چې د ډومین سیسټم طرحې تطبیق به په ملي او نړۍواله کچه د نتایجو او شهادتنامو د آنلاین تصدیق او رسولو، روڼتیا، د وخت سپما او اداري نظم په برخه کې اغېزمن رول ولوبوي.
په پای کې د ګډونوالو ترمنځ د طرحې پلي کېدو په اړه هراړخیز بحثونه ترسره او د عملي کېدو په موخه یې لازمې پرېکړې وشوې.
