د پوهنې وزارت د ښوونیز نصاب ریاست د ۲۲ خالي بستونو لپاره رقابتي ازموینه واخیستل شوه
د پوهنې وزارت اړوند د ښوونیز نصاب ریاست لپاره د ۲۲ تخصصي او مسلکي خالي بستونو د ډکولو په موخه له شاوخوا ۱۶۰ تنو نوماندانو څخه رقابتي ازموینه واخیستل شوه.
په همدې مناسبت جوړو شوو مراسمو کې د ښوونیز نصاب او ښوونکو د روزنې او مسلکي پراختیا لوی رئیس، الحاج مولوي اول ګل ایوبي وویل چې یاد بستونه د آزادې سیالۍ له لارې اعلان شوي، څو د وړتیا، تخصص او تجربې لرونکي کسان د ملک د ښوونیز نظام د پیاوړتیا لپاره جذب شي.
نوموړي زیاته کړه چې د استخدام په بهیر کې د شفافیت، عدالت او روڼتیا اصل په جدي توګه رعایتېږي او هڅه کېږي چې د رقابتي ازموینې له لارې وړ او مستحق کسان وټاکل شي.
د یادونې وړ ده چې د یادو بستونو لپاره د ملک له بېلابېلو سیمو څخه شاوخوا ۱۷۶۰ تنو نوماندانو نوملیکنه کړې وه، چې له دې جملې ۱۶۰ تنه د شرایطو له مخې شارت لېست شوي او له رقابتي ازموینې وروسته به ترې ۲۲ تنه مسلکي او تخصصي کسان غوره شي.
