د ا.ا.ا د پوهنې وزارت پلاوي په کازان ښار کې د پوهنې د وزيرانو په نړيوال کنفرانس کې ګډون وکړ
ياد کنفرانس چې نن ورځ رسما پيل شو، د پوهنې وزارت د ښوونې او روزنې د معين الحاج مولوي سخاء الله سعيد په مشري پلاوي پکې رسما ګډون وکړ.
دغه کنفرانس د روسیې د ولسمشر ولاديمير پوتين په ويډيويي وينا پيل شو. وروسته د روسیې د پوهنې د وزير په شمول د بيلابيلو هيوادونو د پوهنې وزيرانو ويناوې وکړې.
د کنفرانس تر پيل وړاندې د افغانستان د پوهنې وزارت پلاوي د ساينس او ټکنالوژي له نندارتون څخه لیدنه وکړه.
همدا راز يې د کنفرانس په څنډه کې د ايران د پوهنې له مرستيال وزير سره وليدل او په تعليمي ډګر کې يې د دوه اړخيزو همکاريو په هکله خبرې وکړې.
ياد پلاوي مازديګر مهال د روسيې د پوهنې له وزير سره هم وليدل، په دې ليدنه کې د روسيې د پوهنې وزير د امريکايي اشغال پر وړاندې د اسلامي امارت په مشرۍ د افغان مجاهد ولس مبارزه وستايله. نوموړي وويل د افغانستان اسلامي امارت په اړه د روسيې په دريځ کې زيات مثبت بدلون راغلی دی او دغه بدلون به د افغانستان له تعليمي نظام سره د همکاري په برخه کې زيات فرصتونه را منځ ته کړي.
د يادونې وړ ده، چې په دې کنفرانس کې تر ديرشو څخه د زياتو هيوادونو د پوهنې وزيران او مرستيالان ګډون لري او سبا ورځ پنجشنبه به هم دوام وکړي.
