د اروپايي ټولنې ځانګړي استازي د پوهنې وزارت له سرپرست وزیر سره وکتل

 د افغانستان لپاره د اروپايي ټولنې ځانګړي استازي توماس نیکلسون(Tomas Niklasson) او ورسره مل هیئت چې په ترکیب کې یې رافیلا لوډیس (Raffaella Lodice) او جیني ګرین (Jennie Gren) شامل وو، دپوهنې وزارت له سرپرست  وزیر الحاج مولوي حبیب الله آغا سره وکتل.
په یاده لیدنه کې توماس نیکلسون د افغانستان لپاره د اروپايي اتحادیې د مرستندویه پروګرامونو په هکله معلومات وړاندې کړل او ژمنه یې وکړه چې یاده  اتحادیه به  د افغانستان د یو متحد په توګه له یاد هیواد سره د همکاریو دروازه د تل لپاره پرانیستې ساتي.
ورپسې د پوهنې محترم وزیر صاحب راغلیو میلمنو ته ښه راغلاست ووایه او زیاته یې کړه چې افغانستان د نړیوالې ټولنې د یو فعال  غړي په توګه له ټولې نړۍ په تیره بیا اروپايي اتحاديې سره په تعلیمي ډګر کې د نږدې اړیکو او مثبتو تعاملاتو غوښتونکی دی او د پوهنې وزارت به د یادې اتحاديې د مرستندویه فعالیتونو لپاره د یو تسهیل کوونکي  او هم غږي کوونکي رول لوبوي.