د بدخشان ولایت په سایف شهید عالي لېسه کې یو باب لابراتوار پرانیستل شو
د بدخشان ولایت مرکز فیض آباد ښار اړوند د سایف شهید عالي لېسې زدهکوونکو ته د عملي زده کړو آسانتیاوو لپاره، پر ساینسي مضمونونو سمبال یو مجهز لابراتوار، چې ۳۵۰ قلمه عصري او معیاري تجهیزات هم لري، جوړ او د یاد ولایت پوهنې چارواکو په حضور کې په رسمي ډول پرانیستل شو.
په یادو مراسمو کې پوهنې رئیس الحاج مولوي محمد طاهر جواد، د ساینس مرکز علمي غړو، استادانو او زدهکوونکو ګډون درلود.
د پوهنې رئیس د خپلې وینا پرمهال، د ساینس په څانګو کې د پروګرامونو د پیاوړتیا، د علمي لابراتوارونو د جوړولو او د زدهکوونکو او ښوونکو علمي وړتیاوو لوړولو لپاره د پوهنې وزارت د کلک ملاتړ اعلان وکړ، او ټینګار یې وکړ چې د تعلیمي بنسټونو پیاوړتیا د پوهنې وزارت له اساسي لومړیتوبونو څخه ده.
د یاد ښوونځي زدهکوونکو او ښوونکو هم د ساینسي لابراتوار له جوړولو او پرانیستلو څخه خوښي څرګنده او د زدهکوونکو د تعلیمي کچې لاښه والي لپاره یې د پوهنې وزارت له فعالیتونو ستاینه وکړه.
