د دارالهجرت تعلیمي مرکزونو په شمول د هېواد د مدارسو د ثانويه او مافوق ثانويه مرحلو آزموینې پای ته ورسېدې
د پوهنې وزارت د اسلامي زده کړو معینیت د رسمي کړنلارې له مخې، د ټول هېواد په کچه د دارالهجرت تعلیمي مرکزونو په شمول د مدارسو د ثانويه او مافوق ثانويه مرحلو آزموینې چې په ټولیز ډول ورته ۳۲۰۰۰ تنو ط.الب العلمانو نوم لیکنه کړې وه، د روان ق کال رجب المرجب میاشتې په لسمه نېټه پیل شوې، چې همدغه آزموینې نن پنجشنبې ورځ، ۱۵/۷/۱۴۴۶، نېټه په بشپړ بریالیتوب سره د عدالت روڼتیا او نورو اړینو اقداماتو سره سمې پای ته ورسېدې.
د يادو آزموینو اخيستلو د تنظیم، څرنګوالي او څارنې په موخه، د پوهنې وزارت سرپرست الحاج مولوي حبيب الله آغا ميدان وردګ او لوګر ولايتونو ته او د یاد وزارت یو شمېر معینانو او مرکزي رئیسانو د هېواد نورو ولایتونو ته رسمي سفرونه وکړل او دغه آزموینې یې له نږدې څخه وڅارلې.
دغه راز په همدې موخه د پوهنې وزارت مشرتابه له لوري د ترسره شويو ارزونو سربېره، لوړ پوړي نګرانان هم ولايتونو ته د ثانويه او مافوق ثانویه مرحلو د آزموينو څېړنې او ارزونې په موخه تللي دي.
له همدې امله له دارالهجرت مرکزونو څخه د ترلاسه شویو راپورونو له مخې، په خیبر پښتونخوا کې د پوهنې وزارت آتشه له نورو چارواکو سره د يادو مرحلو له آزموينو بهير څخه ليدنه وکړه.
د پوهنې وزارت رهبري پلاوي او نورو مسئولینو د آزموینو له صحنو څخه د لیدنې پر مهال له مسئولینو وغوښتل، چې د آزموینې روڼتیا په پام کې ونیسئ او له ګډون والو یې وغوښتل، چې په جدي ډول د آزموینې نظم او ډسپلین مراعات کړئ.
