د زابل ولايت د پوهنې رياست کار کوونکو ته د کرونا واکسين لګول پیل شول
پوهنې وزارت: زابل : د زابل ولایت د پوهنې رياست کارکوونکو ته د کرونا واکسين لګولو بهیر د یاد ولایت د سرپرستې او مرستیالې مريم رحماني، د پوهنې رئیس نصرالله زاهد، د ميرويس نيکه د لوړو زده کړو مؤسسې رئيس او کار کوونکو په شتون کې پيل او تطبيق شو.
آغلې مریم رحماني د یاد ولایت د عامې روغتیا ریاست له مرستو مننه وکړه او د روغتیایي کارکوونکو هڅې او هلې ځلې یې وستایلې، او د یاد بهیر له پیلیدو یې خوښي څرګنده کړه.
همدارنګه د پوهنې رئیس نصرالله زاهد، له ټولو کارکوونکو وغوښتل چې واکسین وکړي او د عامې روغتیا ریاست سپارښتنې په پام کې ونیسي، څو له دې وژونکې ناروغۍ څخه ځان او د کورنۍ غړي وژغوري.
د یادونې وړ ده، چې د کرونا واکسین د هندوستان هیواد لخوا مرسته شوی چې د زابل ولایت په مرکز او ولسوالیو کې به د پوهنې ریاست ټولو کارکوونکو او ښوونکو ته ولګول شي.
