د لوګر له پوهنې ریاست څخه خبرونه
په لوګر ولایت کې د یونیسف سیمه ییز دفتر د پوهنې ریاست په مرسته د دغه ولایت د ۱۳۰ ښوونځیو ښوونکو ته میتودیک سیمینار جوړ کړ.
د لوګر د پوهنې مشرتابه د یونیسف ادارې له مرستو څخه مننه وکړه او په نورو برخو کې یې هم د دې مرستو د دوام غوښتنه وکړه.
په لوګر ولایت کې د یونیسف سیمه ییز دفتر د ۲۷۵ ښوونځیو لپاره د ۱۲۳۰۰۰ افغانیو په ارزښت د کتابچو او درسي توکو مرسته وکړه.
په پلان کې ده چې د نوي ښوونیز کال له پیل سره سم زده کوونکو ته یاد شوي توکي ورکړل شي.
د پوهنې وزارت د دعوت او ارشاد ریاست د لوګر د ښوونځیو د آمرینو او مدیرانو لپاره د فقهي درسونو په باب سیمینار جوړ کړ.
په دې سیمینار کې له ګډونوالو وغوښتل شول، چې په خپلو ورځنیو چارو کې د دیني اصولو د رعایت تر څنګ د ټولنې د اصلاح په موخه په ښوونځیو کې خپلو ښوونکو او زده کوونکو ته اصلاحي پروګرامونه پلي کړي.
د IRC موسسې سیمه ییز دفتر د لوګر ولایت د پوهنې ریاست په مرسته تر خپل کنترول لاندې د سیمه ییزو او چټکو ټولګیو ۱۷۶ تنو ښوونکو ته میتودیک سیمینار جوړ کړ او د تدریس بېلابېل میتودونه یې ور وښودل.
د لوګر د پوهنې ریاست مشرتابه د مرستندویه بنسټونو له مرستو څخه مننه وکړه او له ښوونکو یې وغوښتل چې له دې جوړ شوي سیمینار څخه سمه ګټه پورته کړي.
د پوهنې وزارت د ساینس او ټکنالوژۍ ریاست د لوګر ولایت د ازرې ولسوالۍ د ۸۰ ښوونځیو ښوونکو ته د ظرفیت لوړونې سیمینار جوړ کړ.
په دغه روزنیز پروګرام کې ګډونوالو ته د کیمیا، بیولوژي، فزیک، ساینس او ریاضي په برخو کې روزنه ورکړل شوه.
