د لوګر ولایت پوهنې ریاست د خپلو یو کلنو مهمو کړنو راپور وړاندې کړ
د لوګر ولایت پوهنې رئیس مولوي جنت ګل عزیز د یوې ځانګړې غونډې پر مهال، چې پکې د یاد ریاست اداري غړو او د اقتصاد، چاپېریال، ملي راډیو- ټلویزیون، تخنیکي او مسلکي زده کړو ریاستونو مسئولینو ګډون درلود؛ د پوهنې ریاست د یو کلنو کړنو او لاس ته راوړنو راپور له هغوی سره شریک کړ.
په یاد راپور کې راغلي وو:
په روان (۱۴۰۲ لمریز) کال کې د افغانستان ا.ا. د پوهنې وزارت له بودیجې، د همکارو بنسټونو، ملي سوداګرو او د هېواد د علمي شخصیتونو په مرسته د ۴۱ میلیونو افغانیو په ارزښت، د ۶۸ پروژو چارې بشپړې او ۱۲۹۶ نوي کسان د ښوونکو او کارکوونکو په توګه په ښوونځیو او مدارسو کې ګمارل شوي دي.
نوموړي وويل: په روان کال کې د لوګر ولايت د ١٩٢ مدارسو ٢٤٨٩٦ تنه طلاب او د ٢٧٦ ښوونځيو ١٧٤٤٥٥ تنه زده کوونکو ته د زده کړې خدمتونه وړاندې شوي دي.
د دې کال په اوږدو کې ۶۶ بابه کلیوالي مدارس، ۳ بابه د لومړنیو زده کړو ښوونځي او د بې سرپرسته ماشومانو لپاره دارالاېتامونه تاسیس شوي او ۱۶۲ بابه دیني مدارس رسمي شوي دي.
د لوګر ولایت پوهنې رئیس د ښوونځيو لپاره د درسي کتابونو د وېش په اړه څرګنده کړه: له پوهنې سره د یو همکار بنسټ په ملاتړ، د ٢٧٦ ښوونځيو اړوند د ٣٥٠٣ ښوونکو او ١٣٠٣٦٠ زده کوونکو لپاره ٥٢٧٢٩٩ ټوکه درسي کتابونه او۶۴ بابه کلیوالي مدارسو ته ٢٢٤٦٨ ټوکه درسي وېشل شوي دي.
دغه راز د پوهنې د ملاتړ یو شمېر ادارو او بنسټونو هم د لوګر ولایت د ښوونیز نظام د پیاوړتیا په برخه کې د خپلو کارونو او کړنو راپور وړاندې او د پوهنې ریاست د کړنو ستاینه یې وکړه.
غونډه د دعائیې په لوستلو سره پای ته ورسېده.
