د ميدان وردګ ولایت د پوهنې ریاست نوی رئیس معرفي شو
د پوهنې وزارت د تضمين كيفيت د معين الحاج مولوي عبدالخالق صادق له لورې د ميدان وردګ ولايت د پوهنې نوی رئیس مولوي محمد عثمان حريت د يو لړ مراسمو په ترڅ کې د ياد رياست کارکوونکو ته رسما معرفي شو.
یادو مراسمو ته د وينا پر مهال د پوهنې وزارت محترم معین صاحب د میدان وردګ ولايت د پوهنې د مخکني رئیس مولوي ګل ولي متقي خدمتونه وستایل او نوي رئیس ته يې په ور سپارل شوي مسئوليت کې د توفيق غوښتنه وکړه.
د يادونې وړ ده، چې د ميدان وردګ ولايت د پوهنې نوي رئیس تر دې وړاندې د زابل ولایت د پوهنې د رئیس په توګه دنده ترسره کوله، چې په دې وروستیو کې د پوهنې وزارت د مشرتابه په وړانديز او د رياست الوزراء د محترم مقام د منظوري په اساس، د ميدان وردګ ولايت د پوهنې د رئیس په توګه وټاکل شو.
