د ننګرهار د ښوونځیو آمرینو ته د ظرفیت لوړونې ورکشاپ پیل شو
د پوهنې وزارت، ننګرهار: د ننګرهار ولایت د مرکز، بهسود او سره رود ولسوالیو ښوونځیو ۳۰ تنو ښځینه اونارینه آمرینو ته د وړتیا لوړونې دري ورځنی ورکشاپ پیل شو.
یاد ورکشاپ د پوهنې ریاست په همکارۍ د برتش کنسل ادارې په مالي لګښت جوړ شوی دی.
د پوهنې رییس حسیب الله شینواري د ورکشاپ د پیل پر مهال وویل، د آمرینو د ظرفیتونو او مهارتونو لوړول د اوسني وخت اړتیا وبلله او زیاته یی کړه څومره چې د ښوونځیو د آمرینو وړتیاوې لوړیږي په هماغه کچه په ښوونځیو کې نظم رامنځته کیږي او د زده کوونکو او ښوونکو پر پوهنیزه کچه هم مخامخ اغیزه کوي.
د پوهنې رییس د مرسته کوونکې ادارې نه د مننې په څرګندولو سره د ورکشاپ له ګډونوالو وغوښتل چې یاد مهارتونه په سمه توګه وڅاري او په خپلو ادارو کې يي په سمه توګه پلي کړي.
