د هلمند کلیوالي ښوونځیو ښوونکو ته د ظرفیت لوړونې ورکشاپ پیل شو
د هلمند ولایت د پوهنې ریاست اړوند محلي ټولګیو ۱۲۸ تنو ښوونکو ته د ظرفیت لوړوني شپز ورځنۍ ورکشاپ پیل شو.
نوموړي ورکشاپ د یونیسف اداري په مالي مرسته په لاره اچول شوي چې د هلمند پوهنې ریاست اړوند د محلي یا چټکو زده کړو ۱۲۸ تنه ښوونکي په کې ګډون لري.
د ورکشاپ ګډونوالو ته به ښوونکو ته د تدریسي پلان، زده کړیز میتودونه او استاد محوري، د ښوونکو د ظرفیت لوړوني او بیلا بیلو برخو کې روزنه ورکړل شي.
د هلمند د پوهنې رییس د ورکشاپ ګډونوالو ښوونکو ته لارښوونه وکړه، چې تدریس کېدونکي مهارتونه په ښه توګه زده او بیا یې په خپلو ټولګیو کې د ماشومانو د روزنې په برخه کې عملي کړي.
د پوهنې رییس داود شاه صفاري د یونیسف له ادارې هم مننه وکړه، چې تل یې د پوهنې ریاست سره د ښوونکو د ظرفیتونو په لوړولو او نورو برخو کې مرستې کړې دي.
د یادولو وړ ده، چې د کلیوالي ښوونځيو ښوونکو ته د هېواد په ګڼو ولایتونو کې د ظرفیت لوړونې ورته ورکشاپونه پیل شوي او هیله ده، چې د پوهنې د کیفیت لوړېدو په برخه کې ګټور تمام شي.
