د پوهنې وزارت د اسلامي زده کړو معینیت پلاوی سرپل ولایت ته ولاړ
د پوهنې وزارت د اسلامي زده کړو معین الحاج مولوي کرامت الله آخندزاده د یو شمېر ښوونیزو چارو د ترسره کولو په موخه سرپل ولایت ته ورسېد. نوموړي په داسې حال کې چې د سرپل پوهنې رئیس مولوي محمد رحماني یې هم ملتیا کوله، د دغه ولایت له والي الحاج مولوي محمد ظریف مظفر سره وکتل او د پوهنې وزارت د پلانونو په اړه یې خبرې او نظرونه تبادله کړل. په دې کتنه کې د پوهنې وزارت معین په دغه ولایت کې د پوهنیزو بنسټونو د پراختیا او د هېواد بچیانو لپاره د ښوونیزو چوپړونو د وړاندې کولو په برخه کې، د یاد وزارت پلانونه له والي سره شریک کړل، چې له مقابل لوري څخه ورسره د پلاونونو د پلي کولو په برخه کې د هراړخیزې همکارۍ ژمنه وشوه. په ورته مهال په هغه کتنه کې چې د پوهنې وزارت د اسلامي زده کړو معین د سرپل ولایت له پوهنې رئیس سره درلوده، د خپل سفر بنسټیزې موخه: د تشکيلاتي ستونزو حل، د مدارسو د طلابو اعاشې برابرول او د دغه ولايت په تعليمي ادارو کې د تدريسي کيفيت لاښه والی وباله. دغه راز نوموړي له مسئولینو وغوښتل چې د پوهنې وزارت ښوونیز نصاب دې د یاد ولايت په مدارسو کې تدريس او د ديني او عصري زده کړو پراختيا يې يو له اساسي بنسټونو څخه وباله او د هېواد د ماشومانو پر سالمې روزنې یې ټینګار وکړ. ورپسې د پوهنې وزارت معین د سرپل ولایت کوهستاناتو ولسوالیو ته ولاړ او هلته یې هم د علماءکرامو او د خلکو له استازو سره په کتنه کې، د تعلیمي وضعیت لاښه والي په موخه د هغوی نظریات او وړاندیزونه واورېدل. نوموړي د یو شمېر مدارسو د ستونزو په اړه وویل، چې د ۱۴۰۴ لمریز کال لپاره به په کوهستانات، البدر، الفتح او بلخاب ولسوالیو کې د لیلیو لپاره ځانګړې آسانتیاوې برابرې کړي.
