د پوهنې وزارت د اسلامي زده کړو معین جوزجان ولایت ته ورسېد

د دغه سفر په پيل کې د پوهنې وزارت مرستيال وزیر د ياد شوي ولايت د پوهنې له رئيس مولوي محمد طاهر جواد سره د دغه ولايت د پوهنې رياست له مسوولينو او کارکوونکو سره وکتل.
د اسلامي زده کړو مرستیال وزير د پوهنې رياست کارکوونکو او مسوولينو ته په خطاب کې وويل، نړۍ اوسمهال د پرمختګ په حال کې ده او د دې وخت را رسېدلى چې په خپلو ديني مدرسو کې د ديني علومو تر څنګ عصري علوم هم تدريس کړو. هغه زده کوونکي چې په مدرسو کې دیني مضامین زده کوي، له عصري علومو څخه هم باید ګټه پورته کوي.
د پوهنې وزارت د اسلامي زده کړو مرستیال وزیر وايي، اوس چې په هېواد کې اسلامي نظام رامنځ ته شوی، د خدای شکر دی، مدرسې باید پیاوړي شي او موږ ټول باید په مدرسو او ښوونځیو کې د علم او پوهې د ودې لپاره هر اړخیزې هڅې وکړو. .
هغه وويل، پوهنې وزارت د هېواد په ٣٤ ولايتونو کې جهادي مرکزي مدرسې له ټولو اسانتياوو سره برابر کړي، څو زده کوونکي په سمه توګه زده کړې وکړي.
مفتي عبدالحفیظ قریشي چې د یوې مدرسې له عالم او استاد دی، ژمنه وکړه چې د پخوا په پرتله به لا زیاتې هڅې وکړي چې د هیواد بچیان په ملي او اسلامي روحیه سمبال کړو.
هغه زياته کړه، چې په تېر حکومت کې دوى د خصوصي ديني مدرسو په برخه کې له ډېرو ستونزو سره مخ وو، چې اوس يې يو شمېر ستونزې په نسبي ډول هوارې شوې دي.
د جوزجان د پوهنې رئيس مولوي محمد طاهر جواد وايي، چې د پوهنې وزارت مرستيال وزیر د خصوصي ديني مدرسو د ليدنې او کتنې په موخه دغه ولايت ته رسېدلى دى.