د پوهنې وزارت د مالي بودیجې کمېټې د خدمتونو څخه ستاینه وشوه
د افغانستان.ا.ا. د پوهنې وزارت سرپرست الحاج مولوي حبیب الله آغا د یاد وزارت د مالي بودیجې کمېټې د ارزښتناکو خدمتونو د ستاینې په موخه، د دغه کمېټې له غړو سره وکتل.
غونډه د قرآن کریم د څو مبارکو آیتونو په تلاوت سره پیل شوه؛ ورپسې د پوهنې وزارت سرپرست د یاد وزارت د مالي بودیجې کمېټې کار ته په اشارې سره د دغه کمېټې کړنې ښې او د قناعت وړ وبللې او زیاته یې کړه : تاسو د ډېر څه مستحق يې، الله تعالی دې ستاسو هڅې او خدمتونه قبول کړي او په دې امید چې د آخرت ثوابونه او بریالیتوبونه ترلاسه کړئ او تمه ده چې خپل استعدادونه د ښوونیز نظام لپاره د خدمت کولو په برخه کې وکاروئ.
نوموړي وویل: دا یو لوی او مهم مسئولیت دی او هیله مند یم، چې په یاده برخه کې اوږه په اوږه کار وکړو او ستونزې له منځه یوسو.
له بلې خوا د پوهنې وزارت د مالي او محاسبې رئیس مولوي صدرالدين سعد د يادې کمېټې په استازيتوب د پوهنې وزارت د مشرتابه له ستاینې څخه د مننې ترڅنګ ژمنه وکړه، چې د مالي او بودیجوي څانګو په ګډون به د یاد وزارت د پلانونو په عملي کولو کې نه ستړې کېدونکې هلې ځلې وکړي.
غونډه د یادې کمېټې غړو ته د ستاینلیکونو په وېشلو، د هېواد لپاره د خیر او فلاح د دعاګانو په لوستلو سره پای ته ورسېده.
