د پوهنې وزارت د معیاري آزموینو او ښوونیزو پایلو ارزونې پلاوي یو شمېر ولایتونو ته رسمي سفر وکړ
د رفیع الله ستانکزي په مشرۍ د پوهنې وزارت د معیاري آزموینو او د ښوونیزو پایلو ارزونې ریاست پلاوي، سمنګان ولایت ته د یو رسمي سفر په ترڅ کې، د یاد ولایت له پوهنې رئیس مولوي محراب الدین اقبال سره وکتل او د یاد ولایت د مرکز او ولسوالیو د ښوونځیو د درېیم ټولګي د زده کوونکو د پوهې د کچې ارزونې په موخه یې خبرې اترې وکړې.
همدارنګه د یو بل خبر له مخې د پوهنې وزارت د معیاري آزموینو او ښوونیزو پایلو ارزونې ریاست پلاوی چې د بلخ ولایت په مرکز او ولسوالیو کې د ښوونځیو د زده کوونکو د تحصیلي کچې په ارزونه بوخت دی، د یاد ولایت له پوهنې رئیس مفتي محمد شریف عثماني سره وکتل.
په دې کتنه کې د زده کوونکو د تحصیلي کچې ارزونې په اړه خبرې ترسره شوې.
د یاد ولایت پوهنې رئیس د پلاوي د سفر د موخو د تطبیق په برخه کې د هر ډول آسانتیاوو او همکارۍ ژمنه وکړه.
