د پوهنې وزارت د ودانیو او ملکیتونو د ساتنې او مراقبت رئیس دایکنډي ولایت ته رسمي سفر وکړ
د پوهنې وزارت د ودانیو او ملکيتونو د ساتنې او مراقبت د رئیس مولوي سمیع الحق حماس په مشرۍ یوه پلاوي دایکندي ولایت ته سفر وکړ او د یوې غونډې په ترڅ کې چې د دغه ولایت په پوهنې ریاست کې جوړه شوې وه، د پوهنې رئیس مولوي رحمت الله قندیلي سره وکتل. د پوهنې وزارت پلاوي یاد ولایت ته د خپل سفر موخه، د پوهنې د بودیجې د مصرف ارزونه د تدارکاتي پروژو، د پاتې اسنادو او حوالو، د مدارسو د نویو لارښودونو برابرول، د ښوونکو د تدریسي ساعتونو تنظیمول، د ښوونکو د پورونو د صندوق پرانیستل، د کار او املاکو په برخه کې د بیارغونې او ساختماني پروژو وضعیت له نږدې څېړل وبلل او د پوهنې پروژو په پلي کولو کې یې د بودیجې په لګښت کې پر روڼتیا ټینګار وکړ. له بلې خوا د دغه ولايت پوهنې مسئولينو هم ورغلي پلاوي ته د ښه راغلاست ويلو پرمهال څرګنده کړه، چې دغه غونډه د دایکندي ولایت د پوهنې د کیفیت لاښه والي او په ښوونیز نظام کې د شته ستونزو د حل په موخه جوړه شوې وه.
