د پوهنې وزارت د ودانیو او ملکیتونو د ساتنې او مراقبت رئیس له پروان ولایت څخه لیدنه وکړه

د پوهنې وزارت د ودانیو او ملکيتونو د ساتنې او مراقبت د رئیس مولوي سمیع الحق حماس په مشرۍ پلاوی، پروان ولایت ته ورسېد. لومړی پلاوي د دغه ولایت له پوهنې رئیس مولوي سید محمد فیضي او پوهنې آمرینو سره په کتنه کې، په بېلابېلو تعلیمي موضوعاتو تفصیلي بحثونه وکړل. د پوهنې وزارت پلاوي یاد ولایت ته د خپل سفر موخه، د پوهنې د بودیجې د مصرف ارزونه، د تدارکاتي پروژو، د پاتې اسنادو او حوالو، د مدارسو د نویو لارښودونو برابرول، د ښوونکو د تدریسي ساعتونو تنظیمول، د ښوونکو د پورونو صندوق پرانیستل، د کار او املاکو په برخه کې د بیارغونې او ساختماني پروژو وضعیت له نږدې څېړل وبلل او د پوهنیزو پروژو پلي کولو برخه کې یې د بودیجې په لګښت کې پر روڼتیا ټینګار وکړ. له بلې خوا د یاد ولايت پوهنې مسئولينو ورغلي پلاوي ته د ښه راغلاست پرمهال، د تدارکاتو پروژو په پلي کولو کې د بشپړې روڼتیا ډاډ ورکړ. د یادونې وړ ده، چې د پوهنې وزارت پلاوی به د پروان له یو شمېر مدارسو او ښوونځيو څخه هم لیدنه وکړي.