د پوهنې وزارت د ولایتي چارو د سمون او همغږۍ رئیس کندهار ولایت ته کاري سفر وکړ
د پوهنې وزارت د ولایتي چارو د سمون او همغږۍ رئیس الحاج مولوي پاینده محمد تعلیم او ورسره مل پلاوی، د ښوونیزو او اداري چارو کتنې په موخه کندهار ولایت ته ورسېد.
په پیل کې نوموړي د کندهار له پوهنې رئیس الحاج مولوي فخرالدین نقشبندي او د یاد ریاست د کلیدي ادارو له آمرینو سره په کتنه کې، د دغه ولایت د پوهنیز وضعیت، پرمختګونو او ستونزو په اړه خبرې او نظرونه تبادله کړل.
دغه راز د پوهنې رياست مسئولینو هم یاد ولايت ته د پلاوي د پلانونو په پلي کولو کې د همکارۍ ژمنه وکړه او په دې برخه کې يې د آسانتياوو برابرولو ډاډ ورکړ.
