د پوهنې وزارت د ښوونیز نصاب او د ښوونکو د مسلکي پراختیا لوی رئیس هرات ولایت ته په رسمي سفر ولاړ
د پوهنې وزارت د ښوونیز نصاب او د ښوونکو د مسلکي پراختیا لوی رئیس الحاج مولوي اول ګل ایوبي او ورسره مل پلاوی، د خپل رسمي سفر په ترڅ کې هرات ولایت ته ورسېد.
د پوهنې وزارت د ښوونیز نصاب او د ښوونکو د مسلکي پراختیا لوی رئیس د هرات ولایت له پوهنې مسئولينو، د ښوونيز نصاب او د ښوونکو د مسلکي پراختيا مديريت له غړو سره په کتنه کې، د مسلکي ښوونکو لپاره د ښوونیزو کړنو د تنظیم په تړاو تفصیلي خبرې وکړې.
همدارنګه نوموړي د پوهنې رياست د بېلابېلو څانګو له کړنو د ستاينې په ترڅ کې، هرات ولايت ته د دغه پلاوي د سفر موخه، د ښوونکو د روزنې د علمي غړو د دندو د لايحې لارښوونه او د هغو پلي کول وبلل.
ورپسې د هرات ولايت پوهنې رئيس روز الدين اسحق يادولايت ته د پوهنې وزارت د پلاوي له ورتګ هرکلى وکړ او ويې ويل، چې د دغه ولايت پوهنې رياست مشرتابه د پوهنې د پراختيا او بډاينې لپاره نه ستړي کېدونکې هلې ځلې کوي.
