د پوهنې وزارت د ښوونې او روزنې معین د خوست ولایت له یو شمېر ښوونیزو بنسټونو لیدنې وکړې
د پوهنې وزارت د ښوونې او روزنې معین الحاج مولوي سخاء الله سعید، چې د هېواد سویلي ولایتونو ته د سرحدي سیمو او ولسوالیو د پوهنیز وضعیت د څېړلو په موخه تللی و، د پکتیا ولایت تر ښوونیز وضعیت ارزونې وروسته د خوست ولایت پوهنې رئیس الحاج مولوي فیض الله جمال حقاني سره په ګډه، د دغه ولایت د سپېرې ولسوالۍ د پوهنې له مسئولینو، مدیرانو، د مدارسو او ښوونځیو له آمرینو، علماوو، قومي مشرانو، د خلکو له استازو او ښوونکو سره په خنګ، د سپين خېل، کوتي، ايوب خېل، مندتي خېل، سور کوخ، منی، سپېلګي او ریزو مدارسو او ښوونځیو کې په جلا جلا توګه وکتل.
د پوهنې وزارت معین د یاد وزارت د پلانونو او پروګرامونو د تشرېح پرمهال، د دوی نظریات، وړاندیزونه او ستونزې په دقت سره واورېدې او ژمنه یې وکړه، چې د پوهنې وزارت له مشرتابه سره په هوکړه او همغږۍ به یې اړوندو ستونزو ته حللاره پیدا کړي.
د يادو سيمو خلکو هم د پوهنې وزارت له معین څخه د دوی ولسواليو او سيمو ته په ورتګ خوښي څرګنده کړه.
