د پوهنې وزارت ستر سلاکار سرپل ولایت ته رسمي سفر وکړ
د پوهنې وزارت ستر سلاکار الحاج مولوي سید غیاث الدین آغا او ورسره مل پلاوي د رسمي سفر په ترڅ کې سرپل ولایت ته ولاړ او د دغه ولایت د پوهنې ریاست له مسئولینو سره یې په یو شمېر مهمو ښوونیزو مسایلو تفصیلي خبرې وکړې.
په پیل کې د سرپل ولایت پوهنې رئیس الحاج مولوي محمد رحماني ورغلي پلاوي ته ښه راغلاست ووایه.
ورپسې د پوهنې وزارت پلاوي د یاد ولایت د پوهنې ریاست له مسئولینو سره د دغه ولایت د ښوونکو د روزنې، ښوونځیو او مدارسو له کتابتونونو څخه لیدنه وکړه او د یاد کتابتونونو په بډاینه کې یې د همکارۍ ژمنه وکړه.
د پوهنې وزارت مشرتابه پلاوي د خپلو خبرو په ترڅ کې ډاډ ورکړ، چې د یاد وزارت مشرتابه هڅه کوي، تر څو د ښوونیزو بنسټونو زده کوونکو ته د زده کړو لاښې آسانتیاوې برابرې کړي.
