د پوهنې وزارت سرپرستې د اشیا فونډیشن له مسوول سره ولیدل
پوهنې وزارت، کابل: د پوهنې وزارت سرپرستې آغلې رنګینې حمیدي د اشیا فونډیشن له مسوول ښاغلي عبدالله احمدزي سره د خپل کار په دفتر کې ولیدل.
په دغه لیدنه کې دواړو لوریو په یو شمیر مسایلو لکه خصوصي ښوونځیو ته پراختیا ورکول، د ماشومانو لپاره د کتابونو برابرول، د ښوونې او روزنې په بهیر کې د کوید ١٩ ویروس منفي تاثیرات او د محلي زده کړو پر تقویت او ظرفیت جوړونې بحث او خبرې وکړې.
آغلې حمیدي د اشیا فونډیشن له همکاریو په تیره د ښوونې او روزنې په برخه کې مننه وکړه او زیاته يې کړه: د پوهنې وزارت موخه د هیواد بچیانو ته د با کیفیته، معیاري او عادلانه ښوونې او روزنې بهیر ته لاسرسی دی چې د اشیافونډیشن بنسټ کولای شي په دغه برخه کې زموږ سره مرسته وکړي او همدا رنګه کولای شي چې د زده کوونکو لپاره په تیره بیا د نجونو لپاره د بورسونو په برابرولو کې پوهنې وزارت سره مرسته او همکاري وکړي.
ښاغلي احمدزي زیاته کړه: که څه هم د کوید ١٩ ویروس د دوی د بنسټ پر فعالیتونو منفي اثر کړی او د دوی ځینې برنامې یې له خنډ او ځنډ سره مخ کړې دي خو د دغه ننګونو په ختمیدو سره به د تیر په شان دخپلو نویو برنامو او د حکومت د لومړیتوبونو په پام کې نیولو سره د ښوونې او زوزنې په برخه کې د پوهنې وزارت تر څنګ ولاړ وي.
