د پوهنې وزارت سرپرست د بلخ ولایت له مرکزي دارالاېتام څخه لیدنه وکړه
د پوهنې وزارت سرپرست الحاج مولوي حبیب الله آغا او ورسره مل پلاوي بلخ ولایت ته د خپل رسمي سفر په ترڅ کې، د یاد ولایت له بېلابېلو ښوونیزو څانګو څخه د لیدنې پر مهال، په داسې حال کې چې د بلخ والي الحاج محمد یوسف وفا، د پوهنې وزارت د بهرنیو اړیکو رئیس وحیدالله هاشمي او د بلخ پوهنې رئیس مولوي عبدالجلیل شهیدخېل هم حضور درلود، د یاد ولایت له مرکزي دارالاېتام څخه لیدنه وکړه.
دوی له یاد دارالاېتام څخه د لیدنې پر مهال، زده کوونکي سالمو زده کړو ته وهڅول او مسئولینو ته یې لارښوونه وکړه تر څو دیادو زده کوونکو د روزنې په برخه کې نه ستړې کیدونکې هلې ځلې وکړي.
د يادونې وړ ده، چې: اوسمهال د بلخ په مرکزي دارالاېتام کې ۱۰۷ تنه يتيم او بې وزله زده کونکي پر زده کړو بوخت دي چې: د هغوى لپاره په وړيا توګه د زده کړې او اعاشې زمينه برابره شوې ده.
