د پوهنې وزارت سرپرست د غزني ولایت اړوند " نورالمدارس مدرسې" د ۳۷۰ تنو طالب العلمانو د فراغت په مراسمو کې ګډون وکړ
د پوهنې سرپرست وزیر الحاج مولوي حبیب الله آغا او ورسره مل پلاوي، د غزني ولایت له نورالمدارس مدرسې څخه د ۳۷۰ تنو طلابو د فراغت په مناسبت جوړو شویو مراسمو کې ګډون وکړ.
په یادو پرتمینو مراسمو کې د پوهنې وزارت د کیفیت تضمین معین الحاج مولوي عبدالخالق صادق او د پلاوي نورو غړو، د غزني پوهنې رئیس الحاج مولوي میر نصیر احمد حسیني، مسئولینو، علماءکرامو، د سیمه ییزو ادارو یو شمېر چارواکو او د دغه ولایت فرهنګي شخصیتونو هم برخه اخیستې وه.
لومړی د قرآن کریم د څو مبارکو آیتونو تر تلاوت وروسته، د غزني ولایت پوهنې رئیس، د پوهنې وزارت سرپرست او ورسره مل پلاوي ته د ښه راغلاست ترڅنګ، د دغه ولایت د ښوونیز او روزنیز وضعیت په اړه د پوهنې مشرتابه ته معلومات وړاندې کړل.
ورپسې د پوهنې وزارت سرپرست په خپلو خبرو کې طالب العلمانو ته د فراغت مبارکي وویله او په ټولنه کې یې د پوهنې پر اهمیت ټینګار وکړ، ویې ویل: اسلام موږ ته د علم په ترلاسه کولو سپارښتنه کړې، دا ځکه چې د فردي او ټولنیز پرمختګ بنسټ په علم او پوهه کې دی.
نوموړي زیاته کړه، زموږ هدف دادی چې د عصري زده کړو ترڅنګ، طلابو ته هم په لوړ معیار د اسلامي زده کړو زمینه برابره کړو.
نورو ويناوالو هم د موضوع په تړاو خبرې وکړې او په هېواد کې يې د پوهنې د بهير د ودې او ملاتړ لپاره د پوهنې وزارت د رهبرۍ له هڅو ستاينه وکړه.
د غونډې په پای کې د پوهنې وزارت سرپرست، نوي فارغ شوي طالب العلمان په نغدي جایزو سره وستایل.
غونډه دعائیې په لوستلو سره پای ته ورسېده.
