د پوهنې وزارت مالي او اداري محترم معین د فراه ولایت دیني مدارسو ازموینو بهیر وڅاره
د پوهنې وزارت مالي او اداري معین محترم الحاج مولوي صبغتالله وصیل، چې د دیني مدارسو ازموینو پروسې د څارنې او ښوونیز او روزنیز وضعیت ارزونې لپاره فراه ولایت ته تللی، هلته یې د پوهنې مسئولینو سره په ګډه، د ثانویه او مافوق ثانویه ازموینو بهیر وڅاره.
همدارنګه، نوموړي په هغه غونډه کې چې د فراه ولایت پوهنې ریاست په تالار کې جوړه شوې وه، ګډون وکړ او د پوهې، اخلاص، صداقت او دیني احساس ترلاسه کولو پر اهمیت یې ټینګار وکړ.
د پوهنې محترم معین د خپلو خبرو پرمهال څرګنده کړه، چې د ځوانانو لپاره اړینه ده ترڅو د پوهنې وزارت لخوا چمتو شويو اسانتیاوو څخه اعظمي ګټه پورته کړي، خپلې زدهکړې او راتلونکې دندې په بشپړ ژمنتیا او مسئولیت ترسره او د خپل خدمت لاره باید د نبوي«صلی الله علیه وسلم» سنتو پر بنسټ وټاکي.
