د پوهنې وزارت څلور تنه نوي مرکزي رئیسان د خپلو اړوندو ریاستونو کارمندانو ته ور وپېژندل شول

د پوهنې وزارت څلورتنه مرکزي رئیسان د یاد وزارت د کیفیت د تضمین معینیت د سرپرست  معین الحاج مولوي عبدالخالق صادق له لوري دیو لړ مراسمو په ترڅ کې د خپلو اړوندو ریاستونو کارمندانو ته ور وپېژندل شول.
په یادو مراسمو کې د کیفیت د تضمین معینیت سرپرست په خپله وینا کې تغیر او تبدیل په نظام کې یو اصل وګاڼه او یادې ټاکنې یې  دکارونو د لا ښه پرمختګ او سمون په موخه وبللې. نوموړي نویو ټاکل شویو مسئولینو ته د الله تعالی له دربار څخه د توفیق غوښتنه وکړه او هغوی ته یې سپارښتنه وکړه ترڅو په پوره اخلاص او ژمنتیا سره خپلو دندو ته حاضر شي او له کارمندانو او مراجعینو سره غوره سلوک وکړي.
د یادونې وړ ده، چې په یادو مراسم کې مفتي عزت الله نوري د نصاب ریاست، مولوي صدرالدین سعد د مالي او حسابداري ریاست، مولوي صبغت الله وصیل د شهادتنامو او نتایجو ریاست او مولوي غلام ربي رباني د تعلیمي نظارت او ارزیابي ریاست د رئیس په توګه د خپلو اړوندو ریاستونو همکارانو ته ور وپېژندل شول.