د پکتیکا د پوهنې ریاست لخوا میاخان کاکا ته د اتل لقب ورکړل شو
د پوهنې وزارت_پکتیکا: د پکتیکا ولایت د مرکز شرنې د ډندنک سیمې اوسیدونکي میاخان کاکا د نوموړي ولایت د پوهنې ریاست لخوا د یوې غونډې په ترڅ کې وستایل شو.
په هغه غونډه کې چې په همدې موخه د پوهنې په ریاست کې جوړه شوي وه ، د پوهنې رییس انجینر محراب الدین شفق نوموړی کس دلوڼو د زده کړو اتل وباله او زیاته یې کړه چې هر پلار باید د خپلو اولادونو لپاره اتل شي تر څو د خپلو بچیانو حق اداء کړي .
همدارنګه نوموړی دولایت محترم مقام او پوهنې ریاست لخوا په مادي او معنوي توګه وستایل شو او همدارنګه د نوموړي کس (میاخان کاکا) په نوم ددوی په کلي کې نږدې دیو مکتب د جوړېدو ژمنه وشوه.
۶۳ کلن میا خان کاکا ځکه اتل بلل کېږي چې دې هره ورځ خپلې دری لوڼې تر ١٢ کیلو متره لیري پدې امید چې لوڼې یې ډاکترانې شي ښوونځي ته بیایې او وروسته یې راولي .
