د ښځو چارو وزارت او سواد زده کړې رياست ترمينځ د همغږۍ غونډه ترسره شوه
د پوهنې وزارت، کابل : د ښځو چارو وزارت سره د همکارۍ په موخه د شوي هوکړه ليک د لا ښه پلي کيدو په پار د پوهنې وزارت د سواد زده کړې د ملي بسیج رياست د رئيس محمد یاسین صمیم په مشرۍ، د ښځو چارو وزارت د کلتوري چارو آمرې میرمن شهلا عارفي او د یاد وزارت یو شمیر نورو چارواکو په ګډون د همغږي غونډه ترسره شوه.
په دې ناسته کې د سواد زده کړې برنامو د لا ښه پلي کولو په موخه د ښځو چارو وزارت سره د هوکړه لیک د میکانیزم په څرنګوالي خبرې وشوې او همداراز په مرکز او ولایتونو کې د میرمنو د اقتصادي پیاوړتیا، د سواد زده کړې د برنامو د پلي کولو په اړه او د ښځو چارو وزارت د نالوسته کارکوونکو د شمیرو په اړه بحث تر سره شو.
د غونډې په دوام د سواد زده کړې د ملي بسیج رئيس محمد یاسین صمیم د ښځو چارو وزارت څخه مننه وکړه چې تل مدام يې د سواد زده کړې ریاست سره هراړخيزه همکاري کړې همداراز نوموړي زياته کړه:
د ښځو چارو وزارت او سواد زده کړې رياست دهمکاريو لړۍ به د شوي هوکړه ليک له مخې لا غځيږي د ښځو چارو وزارت کې د پوهنې له شته استازو یې وغوښتل چې د وزارت د نورو برنامو ترڅنګ د ښځو د اقتصادي پیاوړتيا لپاره، په مرکز او ولایتونو کې د میرمنو په بڼونو کې د مسلکي سواد زده کړې مرکزونه د مسلک په پام کې نیولو سره رامینځته کړي.
