له ولایاتو څخه د پوهنې لنډ خبرونه
فاریاب:
د پوهنې وزارت ستر سلاکار الحاج سید غیاث الدین آغا د یوه کاري سفر په ترڅ کې فاریاب ولایت ته لاړ.
د دغه وزارت د سلاکار د سفر موخه په دغه ولایت کې د فاروقیه جهادي مدرسې او یتیم خانې له فعالیتونو څخه لیدنه ده.
نورستان:
په نورستان ولایت کې د یونیسف موسسې "واش" ولایتي استازو د نورستان ولایت د پوهنې له رئیس تاج محمد مطمین سره وکتل.
د نورستان د پوهنې رئیس له دوی سره د دغه ولایت د ښوونځیو د زده کوونکو د پاکو اوبو او منظمو تشنابونو د نشتوالي ستونزې شریکې کړې او په دې برخه کې یې د مرستو غوښتنه وکړه.
د يادې شوې موسسې مسوولينو د ښاغلي مطمين د هلو ځلو د ستاينې ترڅنګ ژمنه وکړه، چې د يادو شويو ننګونو په حل کې به مرسته کوي.
لوګر:
د CIC موسسې مسوولینو د لوګر ولایت د پوهنې ریاست سره په همغږۍ د ۲۴۵ تنو نوماندانو چې ۵۰ تنه یې ښځې دي، په بېلابېلو برخو کې د سیمه ییزو زده کړو د ۷۰ ټولګیو لپاره د ۷۰ تنو ښوونکو د استخدام په موخه ازادې سیالۍ ترسره کړې.
هرات:
د عبدالظاهر بشیري خصوصي ښوونځي د دولسم ټولګي د زده کوونکو د فراغت دریمه دوره د دغه ولایت د پوهنې د مسوولینو په حضور کې ترسره شوه.
د هرات ولايت د پوهنې رييس دغو فارغانو ته د مبارکۍ ورکولو په ترڅ کې هغوى د هېواد د راتلونکي جوړونکي وبلل او له هغوى يې وغوښتل چې په راتلونکي کې د اسلامي ارزښتونو په رڼا کې خپلې ټولنې ته په لا پياوړتيا سره خدمت وکړي.
