له ولایاتو څخه د پوهنې لنډ خبرونه

پروان:
د پوهنې وزارت د اسلامي زده کړو معین الحاج مولوي کرامت الله آخندزاده او ورسره مل پلاوي د پروان ولایت د پوهنې ریاست د فعالیتونو د کتنې په ترڅ کې یې د دغه ولایت له جهادي مدرسې هم لیدنه وکړه.
په دې لیدنه کې د پوهنې وزارت معین د یادې مدرسې د لیلیې نظم او دسپلین، د زده کوونکو علمي وړتیاوې هم وارزول،د يادونې وړ ده، چې د دې ليدنې په ترڅ کې د يادې مدرسې له زده کوونکو سره نغدي مرسته هم وشوه.
لغمان:
د لغمان ولایت په الینګار ولسوالۍ کې د مخزن العلوم دارالعلوم د ودانۍ د بنسټ ډبره د یوې غونډې په ترڅ کې چې د پوهنې ریاست مسوولینو، دیني عالمانو، مشرانو او د سیمې خلکو په کې برخه اخیستې وه کېښودل شوه.
د دغه ولايت د پوهنې مسوولينو د مدارسو او دارالحفاظونو پر ارزښت او د ټولنې په اصلاح کې یې د رول په باب خبرې وکړې، چې د دغه دارالعلوم د جوړېدو ټول مالي لګښت د ملي تجارانو له خوا ورکول کېږي.
میدان وردک:
په میدان وردګو ولایت کې د سویډن کمیټې د ۱۹ میلیونه افغانیو په لګښت د حضرت عمر فاروق (رض) د ښوونځي د بیارغاونې چارې بشپړې او رسماً یې د دغه ولایت د پوهنې ریاست مسوولینو ته وسپارلې.
د دغه ولايت د پوهنې رئيس مولوي ګل ولي متقي د دې کمېټې له مسوولينو څخه د مننې پر مهال له هغوى وغوښتل، چې د دې ولایت په نورو ښوونځيو کې هم ورته فعاليتونه ترسره کړي.
کندهار
د کندهار د پوهنې ریاست د اسلامي زده کړو آمر مولوي نعمت الله الفت د سپین بولدک ولسوالۍ د حقاني دارالعلوم له تدریسي او اداري چارو څخه د لیدنې پر مهال له هغوی وغوښتل چې د دغه دارالعلوم د ښوونیز کیفیت د ښه والي په برخه کې جدي پاملرنه وکړي.
ننګرهار:
په ننګرهار ولایت کې د دارالعلوم لاغرجوی څخه د علماوو د لویې دورې د فراغت په مناسبت لویه غونډه جوړه شوه.
مفتي حبیب حضرت حقاني د دغه ولایت د پوهنې ریس فارغانو ته د مبارکۍ ویلو پرمهال د دیني علومو  پر اهمیت، د مدارسو او دیني علماوو پر دریځ خبرې وکړې او له فارغانو یې وغوښتل چې د ټولنې د خدمت په لاره کې صادقانه ګامونه پورته کړي.