له ولایتونو د پوهنې لنډ خبرونه
لغمان
د لغمان ولايت مرکز اړوند نوآباد کلي يو شمېر قومي مشرانو د یاد ولايت له پوهنې رئيس مولوي شاه جهان ساجد څخه په خپل کلي کې د يوه ښوونځي د جوړېدو غوښتنه وکړه، چې د پوهنې رئيس له لوري ومنل شوه.
ننګرهار
د ښوونې او روزنې خیریه بنسټ د ننګرهار په خوګیاڼو ولسوالۍ کې پر ۳۰۰ تنو بې وزله او یتیمو زده کوونکو خوراکي توکي او نغدې پیسې ووېشلې.
د یاد ولايت پوهنې رئيس د ياد بنسټ له مرستو مننه وکړه او له نورو بې وزلو زده کوونکو سره يې د ورته مرستو د دوام غوښتنه وکړه.
بلخ
د بلخ ولایت پوهنې ریاست اداري غونډه د یاد ولایت پوهنې رئیس الحاج مولوي عبدالجلیل شهید خېل تر څارنې لاندې د دغه ریاست د آمرینو او مدیرانو په ګډون جوړه شوه.
په یاده غونډه کې د پوهنې وزارت د کړنلارې له مخې د بلخ ولایت د مدارسو په ۲۴۹۵ خالي بستونو کې د علماوو د ګمارنې او یو شمېر نورو اړینو مسایلو په اړه لازمې خبرې او پرېکړې وشوې.
کندهار
د کندهار ولایت په ښوونځیو کې د ۹ زره تدریسي او اداري بستونو ډکولو لپاره د آزموینې اخیستلو بهیر پای ته ورسېد.
د یاد ولايت پوهنې رئيس الحاج مولوي فخرالدين نقشبندي وايي: دغه آزموينې په څو پړاوونو کې د مؤظفې کمېټې له لوري په روڼتیا سره اخیستل شوې او هغه کسان چې معياري نمرې يې تر لاسه کړې، په ديني مدارسو کې به د استادانو په توګه وګمارل شي.
