له ولایتونو څخه د پوهنې خبرونه
بلخ
د بلخ ولایت پوهنې رئیس الحاج مولوي عبدالجلیل شهیدخیل د دې ریاست د تعلیمي څارنې غړو ته یې په مرکز او ولسوالیو دنده ورکړه، ترڅو د ښوونځیو، دیني مدارسو او نورو تعلیمي بنسټونو د اداري او ښوونیزو چارو څخه څارنه وکړي.
بغلان
د بغلان ولایت پوهنې رئیس الحاج مولوي محمد نور عزیزي د دغه ریاست د بېلابېلو څانګو له آمرینو او مدیرانو سره وکتل او له هغوی سره یې د مسلکي کارکوونکو او ښوونکو د ګمارلو، حساب ورکولو، کارکوونکو ته د کاري راپورونو وړاندې کولو، د قوانینو د تنظیمولو، د تدارکاتو او د کارکوونکو د ارزونې په باب خبرې وکړې.
کندهار
د کندهار ښار د صوفي بابا عالي لېسې زده کوونکو د پوهنې د مسوولینو او قومي مشرانو په ګډون د یو لړ مراسمو په ترڅ کې خپلې علمي لاسته راوړنې او لاسي صنایع نندارې ته وړاندې کړل.
د کندهار ښار د پوهني رئيس مولوي محمد عثمان روحاني د يادو زده کوونکو د نوښتونو او هلو ځلو ستاينه وکړه.
هرات
د هغو ۲۷۴ خیمو د وېش بهیر پیل شو، چې د یونیسف د سیمه ییز دفتر له لوري د هرات پوهنې ریاست ته ورکړل شوې وې
د هرات ولايت د پوهنې رئيس مولوي عبدالله اميني د دغه ادارې له سيمه ييز دفتر څخه مننه وکړه او ويې ويل دغه خیمې به هغو ښوونځیو ته ورکړل شي، چې درسي خوني نه لري.
نورستان
د کامدېش ولسوالۍ د پوهنې آمر مولوي مجيب الرحمن ثوبان عمري په خپله کاري ساحه کې له یو شمېر ښوونځيو څخه څارنه وکړه او د يادو ښوونځيو له مديرانو او ښوونکو سره يې د ښوونيزو چارو د ښه والي په موخه خبرې وکړې.
