له ولایتونو څخه د پوهنې خبرونو لنډیز
![13](/sites/default/files/2023-08/whatsapp_image_2023-08-24_at_12.32.34_pm_1.jpeg)
تخار
د تخار ولایت مرکز تالقان کې د اورته بز د نجونو عالي لېسې د احاطوي دېوال بنسټ ډبره، د پوهنې رئیس الحاج مولوي حزب الله مبشر له لوري، د یو شمېر دیني علماوو او مخورو په حضور کې کېښودل شوه.
د یاد دېوال د جوړولو لګښت لس زره امريکايي ډالره اټکل شوى، چې د پوهنې یوه دوست شخصیت الحاج امام يار له لوري ورکول کېږي.
جوزجان
د پوهنې وزارت د کیفیت تضمین معینیت پلاوی د څارنې او ارزونې په موخه، جوزجان ولایت ته ولاړ او ټاکل شوې چې په مرکز او ولسوالیو کې د یاد ولایت د پوهنې ریاست اداري او تدریسي چارې وڅېړي.
د پوهنې رئیس الحاج مولوي محمدطاهر جواد د یاد پلاوي دکاري پلانونو دتطبيق په لاره کې له خپل لوري د آسانتياوو برابرولو ژمنه وکړه.
غزني
د غزني ولایت پوهنې رئیس الحاج مولوي میر نصیر احمد حسیني د یاد ولایت د کلاغج په کلي کې د ابوبکر صدق مدرسې اداري او تدریسي چارې وڅېړلې او د یادې مدرسې له زده کوونکو او استادانو سره یې د جلا کتنو په ترڅ کې، دهغوی اداري ستونزې او اړتياوې واوريدې او د حل په موخه يې د همکارۍ ژمنه وکړه.
نیمروز
د نیمروز ولایت پوهنې ریاست د دیني، عصري او تخصصي مضامینو د ۹۳۰۰ جلده درسي کتابونو د وېش لړۍ د یاد ولایت په دارالعلومونو، مدارسو او دارالحفاظونو کې پیل کړه.
دایکنډي
د دایکندي ولایت پوهنې ریاست د ښوونکو د ۳۲ بستونو لپاره له ۹۵ نوماندانو څخه د آزاد رقابت آزموینه واخیسته، په پام کې ده هغه کسان چې معیاري نمرې پوره کړي د یاد ولایت په محرومو او لرې پرتو ښوونځیو کې د ښوونکو په توګه وګمارل شي