له ولایتونو څخه د پوهنې لنډ خبرونه
پکتیکا
د پوهنې وزارت د پلان ریاست دوه تنه کارکوونکو پکتیکا ولایت ته د يوه رسمي سفر په ترڅ کې، د ياد ولايت پوهنې ریاست د اړوندو څانګو کارکوونکو ته یو ښوونیز او میتودیک سیمینار داير کړ.
د پوهنې وزارت پلاوي، د پلان مدېریت کارکوونکو او ښوونيزې څارنې آمرينو ته، د عملیاتي او کاري پلانونو د چمتو کولو، د فعالیتونو او لاسته راوړنو په اړه د راپورونو لیکلو او نورو اړوندو موضوعاتو په اړه روزنه ورکړه.
بلخ
د بلخ ولایت پوهنې ریاست ځانګړې غونډه، د ياد ولايت د ښوونې او روزنې آمر تر څارنې لاندې، د دولتي ادارو او همکارو بنسټونو د استازو په ګډون جوړه شوه.
په ياده غونډه کې ګډون والو د پوهنې ریاست د یو شمېر پروژو د تطبیق په اړه خبرې وکړې.
کابل
د لوړو زده کړو وزارت د آزموینو ملي کمېټې، د کابل ښار اړوند ښوونځیو د کانکور نوماندانو د داخلې کارتونه، د ياد ښار پوهنې ریاست ته وسپارل.
هرات
عاطفي بنسټ د هرات ولایت پوهنې ریاست په همکارۍ د کهسان، ګلران، چشت شریف، ادرسکن او اوبه ولسوالیو د ښوونځيو پنځوسوو ښوونکو ته د ظرفیت لوړونې سیمینار داير کړ.
په ورته وخت کې، دغه بنسټ د يادو ولسواليو زرو تنو زده کوونکو ته بکسونه او نور درسي مواد هم ووېشل.
دایکنډي
د دايکنډي ولايت پوهنې رئيس الحاج مفتي رحمت الله مدثر په مشرۍ، د "شيطان لښکر" تر سرليک لاندې علمي سيمينار جوړ شو، چې پکې د ياد رياست آمرينو، مدېرانو، ښوونکو او کارکوونکو ګډون درلود.
د سيمينار په پای کې
د ګډون والو پوښتنو ته ځوابونه هم ورکړل شول.
