لوګر دارالمعلمین ته نوی رئیس معرفي شو
د لوګر ولایت د عالي دارالمعلمین لپاره انجنیر محمد اکبر ستانکزی د نوي رئیس په توګه معرفي او دنده یې پیل کړه.
د هغه د معرفي کولو په غونډه کې والي الحاج محمد انور اسحاق زي،د ولایتي شورا رئیس حسیب الله ستانکزي، د پوهنې رئیس عبدالوکیل او د یو شمېر دولتي ادارو رئیسانو برخه اخیستې وه.
نوموړی د پوهنې وزارت په وړاندیز او د ولسمشر په حکم د دارالمعلمین د پخواني رئیس محمد قاسم فهیمي په ځای ټاکل شوی دی.
انجنیر محمد اکبر ستانکزی د حضرت الدین زوی، په ۱۳۵۷ کال د لوګر د محمدآغې ولسوالۍ د کتب خیلو په سیمه کې زېږېدلی دی.
هغه خپلې لوړې زده کړې د کابل پوهنتون د انجینرۍ په څانګه کې کړې دي او د پوهنې په برخه کې ښه تجربه لري.
نوموړي له ۱۳۹۱ کال نیولې د ۱۳۹۶ کال تر پایه پورې د لوګر د پوهنې رئیس په توګه هم دنده ترسره کړې ده.
له دې مخکې د لوګر د عالي دارالمعلمین رئیس محمد قاسم فهیمي وو، چې هغه دغه دنده نږدې درې کاله ترسره کړه.
