لوګر کې خلکو یوه ښوونځیو ته د ۴ ټولګیو ودانۍ جوړه کړه
د لوګر د بره کي برک ولسوالۍ د زقوم خیلو د نجونو او هلکانو منځني ښوونځي ته د ۴ ټولګیو درلودونکې ودانۍ جوړه شوه.
یاده ودانۍ دیني عالمانو،قومي مشرانو او د زده کوونکو د کورنیو غړو په ګډه د چندې پر راټولو شویو پیسو جوړه کړې ده.
د خلکو پر چندې جوړه شوې ودانۍ ۴ درسي ټولګي لري، چې په یوه وخت کې د ۲۰۰ زده کوونکو د ځایولو وړتیا لري.
د زقوم خیلو د نجونو او هلکانو په منځني ښوونځي کې شاوخوا ۴۰۰ زده کوونکي زده کړې کوي، چې ۲۲۰ یې نجونې دي.
د لوګر د پوهنې رئیس عبدالوکیل کلیوال وایي، چې په روان ښوونیز کال کې د پوهنې له بهیر سره د خلکو په مرستو کې زیاتوالی راغلی دی.
هغه زیاته کړه، د لوګر خلکو له پوهنې ریاست په بیلا بیلو کې مرستې کړې دي، ښوونځیو ته یې ودانۍ جوړې کړي، نغدې پیسې یې ورکړي، بند ښوونځي یې خلاص کړي او هم یې په ښوونځیو کې د ښوونځي عمر برابر ماشومانو د شاملولو په برخه کې پراخه ونډه اخېستې ده.
دا په داسې حال کې ده،چې څو ورځې مخکې هم د یادې ولسوالۍ د قلعه ګهنه لېسې ته د خلکو پر چندې جوړه شوې ودانۍ ګټې اخیستنې ته سپارل شوې ده.
