لوګر کې د دولتي ښوونځیو د یوولسم او دولسم او د خصوصي ښوونځیو د ټولو ټولګیو درسي بهیر پیل شو
د پوهنې وزارت_لوګر: په لوګر ولایت کې د دولتي ښوونځیو د یوولسم او دولسم ټولګیو او د خصوصي ښوونځیو د ټولو ټولګیو حضوري زده کړې پیل شوې.
په دې اړه په جوړو شویو مراسمو کې، چې د حضرت عمر فاروق (رض) د هلکانو او د بي بي آمنې د نجونو په لېسو او دغه راز د زیري په خصوصي ښوونځي کې جوړ شوې وه، د پوهنې سرپرست رئیس نثار احمد سیدي، د پوهنې ښاري آمر خواجه سیف الرحمن مؤمنیار، د دغو ښوونځیو آمرانو، ښوونکو او زده کوونکو برخه اخیستې وه.
د لوګر د پوهنې سرپرست رئیس نثار احمد سیدي د دولتي او خصوصي ښوونځیو د درسي بهیر د پیل په مراسمو کې له زده کوونکو غوښتنه وکړه، چې ښوونځیو ته د راتلو پر مهال پر ځانونو د پوهنې او عامې روغتیا وزارتونو روغتیایي سپارښتنې عملي کړي.
د کابینې د پریکړې او د ښوونځیو د بیا پیلېدو له لارښود سره سم د وږي د میاشتي په لومړۍ نیټه د دولتي ښوونځیو د یوولسم او دولسم ټولګیو او همدا رنګه د خصوصي ښوونځیو د لومړي ټولګي څخه تر دولسم ټولګي پورې درسي بهیر رسمآ پیل شو.
له دې مخکې د کرونا ناروغۍ د ویرې له امله د هېواد ټول دولتي او خصوصي ښوونځي د تېرو پنځو میاشتو راپدېخوا تړلي وه، چې زده کوونکو ته یې د یو شمېر رسنیو له لارې غیر حضوري زده کړې ورکول کېدې.
په لوګر کې دا مهال ۲۷۳ دولتي او ۲۲ خصوصي ښوونځي شته، چې د دولتي ښوونځیو په یوولسم او دولسم ټولګیو کې د ۱۵۲۷ نجونو په ګډون ۱۰۳۱۹ زده کوونکي او په خصوصي ښوونځیو کې د ۴۹۷ نجونو تر څنګ ۷۰۳۹ زده کوونکي پر زده کړو بوخت دي.
د لوګر د پوهنې سرپرست رئیس نثار احمد سیدي د دولتي او خصوصي ښوونځیو د درسي بهیر د پیل په مراسمو کې له زده کوونکو غوښتنه وکړه، چې ښوونځیو ته د راتلو پر مهال پر ځانونو د پوهنې او عامې روغتیا وزارتونو روغتیایي سپارښتنې عملي کړي.
هغه زیاته کړه، چې په ټولو دولتي او خصوصي ښوونځیو کې به زده کوونکو ته د پوهنې او عامې روغتیا وزارتونو د لارښوونو په رعایتولو سره زده کړې ورکړل شي.
پوهنې وزارت او د لوګر د پوهنې ریاست د پاتې ټولګیو د حضوري تدریس د پیل په اړه د کابینې پریکړې او د روغتیا وزارت لارښوونو ته په تمه دي.
