لوګر کې د لیک لوست زده کړې ۲۲۹ کورسونه فعال شوي
په لوګر ولایت د نالوستو کسانو د لوستي کولو په موخه د لیک لوست د زده کړې ۲۲۹ کورسونه جوړ شوي دي.
دغه کورسونه څه موده مخکې د پوهنې ریاست د لیک لوست زده کړې آمریت له خوا جوړ شوي، چې ۹ میاشتې به دوام وکړي.
په نوموړو کورسونو کې د ۱۰۷۱ میرمنو په ګډون ۳۰۱۲ کسان جذب شوي دي، چې ټول د پاخه عمر او نالوستي وګړي دي.
یادو کسانو ته د قران کریم، دري، ریاضي، او املا درس ورکول کېږي، چې ۹ میاشتې وروسته به د زده کړو له نعمته برخمن شي.
د لوګر د پوهنې رئیس عبدالوکیل کلیوال وایي، چې د بې سوادۍ کچې د راټیتېدو لپاره یې هلې ځلې پیل کړي څو د بې سوادۍ کچه را ټیټه شي.
د یادونې وړده، چې په لوګر کې په تېرو کلونو کې هم د نالوستو کسانو د لوستي کولو لپاره ورته کورسونه جوړ شوي دي.
