په غزني ولایت کې یو باب ښوونځی تاسیس شو
د غزني ولایت د ګیلان ولسوالۍ په یوه سیمه کې یو نوی محلي ښوونځی افتتاح او هممهاله د یاد ښوونځي لپاره د څلورو درسي ټولګیو جوړولو چارې هم د سیمې د خلکو په مالي لګښت پیل شوې.
د ګیلان ولسوالۍ پوهنې مسؤلینو په وینا، د یادو څلورو درسي ټولګیو جوړولو چارې پر دوه جریبه ځمکه پیل شوې، چې د سیمې د خلکو له لوري وقف شوې او د ځمکې او ودانیزو چارو ټولیز لګښت شاوخوا ۹۰۰ زره افغانۍ اټکل شوی دی.
د پوهنې وزارت مشرتابه د پوهنې د ودې او پراختیا په برخه کې د خلکو همکاري ارزښتناکه بللې او هیله یې څرګنده کړې چې د خلکو په همکارۍ به په راتلونکي کې هم د ښوونې او روزنې د پراختیا او پیاوړتیا په موخه لا ډېر مثبت ګامونه واخیستل شي.
