په لوګر کې د دیني عالمانو د سویې تثبیت ازموینې پیل شوې
په لوګر ولایت کې د ۱۰۴ دیني عالمانو د سویې د تثبیت معلومولو په موخه د ازموینې اخیستلو بهیر په رسمي ډول پیل شو.
د دې ازموینې د پیل په مراسمو کې، د پوهنې رئیس مولوي جنت ګل عزیز، تدریسي مرستیال مولوي عبیدالله هشام، د مالي او اداري چارو مرستیال محمد عارف معاذ، د اسلامي زده کړو مرستیال صدیق الله عزیزي او د پوهنې ښاري آمر مفتي مولوي ضیاء الحق ملنګ برخه اخیستې وه.
یاده ازموینه د پوهنې وزارت د اسلامي زده کړو معینیت د لارښوونې له مخې د یو شمېر جیدو او شیخ الحدیثو علماوو تر بشپړې څارنې لاندې اخیستل کېږي، چې یوه اوونۍ به دوام وکړي.
په دغې ازموینه کې ۱۰۴ دیني عالمانو برخه اخیستې ده، چې ټولې ازموینې به یې په بشپړې روڼتیا سره واخیستل شي.
د لوګر د پوهنې رئیس مولوي جنت ګل عزیز د یادې ازموینې پر اخیستلو خوښي څرګنده کړه او زیاته یې کړه، چې د ازموینې د اخیستلو لپاره یې ټول لازم تدابیر نیولي دي.
نوموړي وویل، چې ټولې ازموینې به د پوهنې وزارت د اسلامي زده کړو معینیت د کړنلارې له مخې واخیستل شي.هغه د ازموینې له برخه والو غوښتنه وکړه، چې د ازموینې ورکولو پر مهال د پوهنې وزارت د اسلامي زده کړو معینیت سپارښتنې په پام کې ونیسي او عملي یې کړي.
