په محرومو سیمو کې د ښوونې او روزنې د زمیني چمتو کول د پوهنې وزارت لپاره لومړیتوب لري
د پوهنې وزارت، کابل: د پوهنې وزارت سرپرستې آغلې رنګینې حمیدي، د ډایکنډي ولایت والي ضیا همدرد، د دغه ولایت د پوهنې رییس او په ملي او ولایتي شوراګانو کې د دغه ولایت له یو شمیر استازو سره د پوهنې وزارت په مرکزي دفتر کې وکتل.
د دي غونډې په جریان کې په ډایکنډي ولایت کې د پوهنې د پرمختګ، د پوهنې ستونزي او د ښوونځیو د ودانیو جوړول، د حقالزحمه ښوونکو ګمارنه، د نوي تشکیلاتو او نورو اداري مسایلو په اړه تفصیلي خبرې وشوې.
د ډایکنډي ولایت د ښوونې او روزنې ریاست رییس، د زده کړې په برخه کي د دغه ولایت د خلکو علاقې ته په اشارې سره ټینګار وکړ چې د ډایکنډي ولایت د پوهنې په برخه کې د یادو ستونزو په حلولو سره به د زده کونکو لپاره د ښوونې او روزنې لا ښه زمینه برابره شي.
د پوهنې وزارت سرپرستې آغلې رنګینې حمیدي، په دغه ولایت کې د پوهنې د ستونزو د شریکولو له امله د ډایکنډي ولایت له سیمه ییزو چارواکو نه مننه وکړه او زیاته یې کړه چې په ټول هیواد کي په ځانګړي توګه لیرې پرتو سیمو کې د کیفیت لرونکی زده کړې چمتو کول د پوهنې وزارت له لومړیتوبونو څخه دي
اوهڅه کوي د ډایکنډي ولایت د پوهنې په برخه کې شته ستونزې ژر تر ژره حل کړي.
