په ننګرهار کې د ماشومانو چمتوالې دورې (وړکتون) په معیارونو د نظرغوښتنې ورکشاپ پیل شو
د پوهنې وزارت_ننګرهار: د پوهنې، کار او ټولینزو چارو او عامې روغتیا وزارتونو ګډې جوړې شوې کمېټې له لورې په ننګرهار ولایت کې د پوهنې ریاست او نورو اړونده ادارو کارمندانو ته د ماشومانو مخکې له زده کړو (وړکتون) دورې لپاره د سټنډرډونو په پرمختګ نظر غوښتنې او تثبیت دوه ورځنې ورکشاپ پیل شو.
د ورکشاپ په پرانیسته کې د ننګرهار پوهنې رییس حسیب الله شینواري وویل:د چمتوالي( وړکتون) دوره ماشومانو سره د ښوونځي په زده کړو کې اساسي مرسته کوي، د وړکتون دوره ماشوم له مور لرې زده کړیز چاپیریال سره اشنا کوي، چې د ښوونځي په دوره کې پر ماشوم د نوي چاپیریال فشار نه وي.
پوهنې رییس وویل د ماشومانو د استعدادونو را برسیره کولو لپاره باید له بېلا بېلو میتودونو کار واخېستل شي، ترڅو د هر ماشوم د زده کړو استعداد لوری او برخه مالومه شي.
په غونډه کې د کار او ټولنیزو چارو ریس او د عامې روغتیا ریاست مرستیال هم په خپلو خبرو کې د وړکتون دورې په ارزښت وغږیدل.
دغه ورکشاپ چې د دروګونو وزارتونو د ګډې کمېټې د غړو له لورې دایر شوی، چې په راتلونکو دوو ورځو کې به د پوهنې ریاست او نورو اړوندو ادارو له مسولینو او مسلکي کارمندانو سره د وړکتون دورې لپاره په نوو جوړو شوو معیارونه بحث وکړي او د دوی نظریات به واخلي.
