په ننګرهار کې د يو ښوونځي نوې ودانۍ ګټې اخیستنې ته وسپارل شوه
د پوهنې وزارت_ننګرهار: د ننګرهار ولایت د کامې ولسوالۍ د محمدعلي لونګین ښوونځي نوې ودانۍ د یو لړ مراسمو په ترڅ کې د والي شاه محمود میاخیل، د پوهنې رییس حسیب الله شینواری او سیمې مخورو لخوا د پټې په پریکو لو سره ګټې اخیستنې ته وسپارل شوه!
. په پېل کې د ننګرهار والي شاه محمود میاخیل په خپلو خبرو کې د سیمې خلکو ته ددغه ودانۍ د جوړیدو له امله مبارکي وویله دیاد ښوونځي له ښوونکو یې وغوښتل چې خپل زده کوونکي پر ملي روحیه وروزي. ننګرهار والي همدا راز دسیمې خلکو ته په ښوونیزه برخه کې د هغوې دستونزو د حل ډاډ ورکړ بیا د ننګرهار د پوهنې ریس حسیب الله شینواري په خپلو خبرو کې وویل د محمد علي لونګین لومړنی ښوونځی شپږ سوه نجونې او هکلکان زده کوونکي لري چې تر دې وړاندې یې په ازاده فضا کې زده کړې کولې خو اوس یې ددې ودانې په جوړیدو سره د سرپناه ستونزه هواره شوه.دپوهنې ریس د سیمې له خلکو وغوښتل چې دپوهنیز بهیر سره د مرستو او ګډون او همدارنګه ددې ودانۍ دښه ساتلو په موخه ولسي شورا جوړه کړي .دسیمې دخلکو په استازیتوب مسلم ابراهیمي خبرې وکړې او دیاد ښوونځي لپاره یې د اړتیا وړ احاطې دیوال جوړولو او خدماتي پرسونل د ګومارنې غوښتنه وکړه چې د مسولینو له لورې ورته د حل ډاډ ورکړشو.
دکامې ولسوالۍ د محمدعلي لونګین لومړني ښوونځي نوې ودانې چې په درې زره پنځه سوه متره مربع زمکه کې په درې پوړونو کې په پاخه اواساسي ډول دیو کال په موده کې د ښار جوړونې ریاست تر څارنې لاندې په نولس نیم ملیونه افغانۍ جوړه شوې ۱۸ درسي او اداري خونې او نور اړین ملحقات لري.
