په هرات ولایت کې ۲۸ ښوونځي بیا پرانیستل شول
د پو هنې وزارت، هرات: د هرات ولایت د پوهنې ریاست په هلو ځلو اته ویشت ښوونځي چې په تیرو څو کلونو کې د بیلابیلو لاملونو له امله په لرې پرتو ولسوالیو کې تړل شوي وو یوځل بیا پرانیستل شول.
د هرات د پوهنې ریاست د تعلیمی څارنې آمر غلام حبیب نیک خواه په وینا، دا ښوونځي په ادرسکن، ګذره، ګلران، زیر کوه، کهسان، کوه زور، پشت کوه او زاول ولسوالۍ کې دي چې د بیلا بیلو لا ملونو له امله له تیرو څلورو کلونو راهیسې تړلي وو.
د هرات د پوهنې رییس، زکريا رحیمي وايي: د ښوونځي جوړونې ټولنیزه ټولنه چې د هرات ولایت د خیریه سوداګرو لخوا پر مخ وړل کیږي دا منلې چې د روان ښوونیز کال تر پایه به د ۴۰ تنو ښوونکو تنخواه (معاش) د یادې ټولنې لخوا ورکول کیږی.
په لیرې پرتو ولسوالیو کې د دې ښوونځیو پرانیستل په هرات کې د پوهنې لپاره د یوې لویې لاسته راوړنې سربیره، زرګونو زده کونکو ته مناسب ښوونیز چاپیریال برابر کړ.
