په پکتیا کې له دیني علماءکرامو او مهتممینو سره د پوهنې وزارت مشرتابه مشورتي غونډه جوړه شوه
د دیني مدارسو د ښوونیز کیفیت لوړولو، د درسي نصاب د غوره تطبیق او د اداري چارو تنظیم په موخه، په پکتیا کې د پوهنې وزارت د مشرتابه، علماءکرامو او د دیني مدارسو د مهتممینو مشورتي ناسته ترسره شوه.
په دې ناسته کې د پوهنې وزارت د اسلامي زدهکړو معین محترم الحاج مولوي کرامتالله آخندزاده، د مالي او اداري چارو معین محترم الحاج مولوي صبغتالله وصیل، د پکتیا والي محترم ملا مهرالله حماد، د وزارت یو شمېر ښاغلو رئیسانو، د پوهنې مسوولینو او د پکتیا، پکتیکا، خوست او لوګر ولایتونو د دیني مدارسو علماءکرامو ګډون درلود.
په پیل کې د دیني مدارسو او دارالحفاظونو رئیس محترم الحاج مولوي محمد یوسف ثاقب وویل چې د یادې ناستې موخه د دیني مدارسو کیفیت په اړه د نظرونو تبادله او د ښوونیز بهیر لا ښه والي لپاره د ګډو لارو چارو موندل دي.
ورپسې د اسلامي زدهکړو معین، د ښوونیزو بنسټونو د سالمې او معیاري ښوونې پر اهمیت خبرې وکړې او ویې ویل، چې د ښوونې او روزنې د بهیر لا پیاوړتیا لپاره د پوهنې مسوولینو، علماءکرامو او ټولنې ګډه همکاري اړینه ده.
نوموړي د اسلامي زدهکړو معینیت لاستهراوړنې هم له ګډونوالو سره شریکې کړې.
همدارنګه، د پوهنې وزارت د مالي او اداري چارو معین، د شریعت له نظره د ادارې، مدیریت، نظم او کنټرول په اړه معلومات وړاندې کړل او د اسلامي ارزښتونو په ساتنه، د زدهکوونکو په سالمه روزنه او د علم په پراختیا کې یې د علماءکرامو رول مهم وباله.
د ناستې په پای کې ګډونوالو د پوهنې وزارت د مسوولینو له هڅو مننه وکړه او دا ډول ناستې یې د دیني مدارسو د کیفیت ښه والي لپاره اغېزمنې وبللې.
وروسته د دیني مدارسو د کیفیت او معیارونو په اړه اتهمادیزه پوښتنپاڼه له ټولو علماءکرامو سره شریکه شوه، څو د سوېل ختیز زون په کچه د دیني مدارسو د کیفیت او معیارونو په اړه د هغوی نظرونه راټول او د پوهنې وزارت له رهبرۍ سره شریک شي.
