پکتیا ولایت کې د یوه لومړني ښوونځي د ودانۍ جوړلو چارې پیل شوې
د پکتيا ولايت سيد کرم ولسوالۍ کې د "بوکر" د لومړني ښوونځي د بنسټ ډبره، د يو لړ مراسمو په ترڅ کې، چې پکې د پوهنې رئيس او مشرتابه، ديني علماوو او مشرانو ګډون درلود، کېښودل شوه.
د یاد ښوونځي ودانۍ ۶ درسي خونې له نورو له اړینو ملحقاتو سره لري او ټولیز لګښت ۲ میلیونه افغانۍ اټکل شوی، چې د پکتیا ولایت د حداد فرهاد فرهنګي بنسټ له لوري ورکول کېږي.
د پوهنې رئيس مولوي عبدالوکيل خالد او د يادې ولسوالۍ يو شمېر مشرانو په خپلو خبرو کې، د دغه فرهنګي بنسټ له مسئولينو څخه د مننې ترڅنګ وويل، د ښوونيزو بنسټونو جوړول له ټولنې څخه د ناخوالو په له منځه وړلو او د يوې اغېزمنې ټولنې په رامنځته کولو کې د پام وړ نقش لري او دا د صدقه جاریه اعمالو څخه ګڼل کېږي.
په ورته وخت کې د سیمې اوسېدونکي خوښ دي، چې د یادې ودانۍ په جوړېدو سره به د دوی د ماشومانو د درسي ټولګیو د نشتوالي ستونزه هواره شي.
